ബര്‍ലിന്‍: ജര്‍മ്മനിയിലെ പ്രവാസി ഇന്ത്യന്‍ സമൂഹത്തിന് അഭിമാന നിമിഷം സമ്മാനിച്ചുകൊണ്ട് തലസ്ഥാന നഗരമായ ബര്‍ലിനിലെ നോയ്കോള്‍ണ്‍ (Neukoelln) ജില്ലയില്‍ അത്യാധുനിക രീതിയില്‍ നിര്‍മ്മിച്ച പുതിയ ഹിന്ദു ക്ഷേത്രം ഭക്തര്‍ക്കായി തുറന്നുകൊടുത്തു. ഏകദേശം രണ്ട് പതിറ്റാണ്ടിലേറെ നീണ്ട ആസൂത്രണങ്ങള്‍ക്കും നിര്‍മ്മാണങ്ങള്‍ക്കും ശേഷമാണ് ജൂണ്‍ 3 ന് ബുധനാഴ്ച ക്ഷേത്രത്തില്‍ പ്രാണപ്രതിഷ്ഠാ ചടങ്ങുകള്‍ ആരംഭിച്ചത്.

ബര്‍ലിനില്‍ ഉയരുന്ന രണ്ടാമത്തെ വലിയ ഹിന്ദു ക്ഷേത്രമാണിത്. വിഘ്നേശ്വരനായ ഗണപതി ഭഗവാനാണ് 'ശ്രീ ഗണേഷ ഹിന്ദു ടെംപിള്‍' എന്ന് പേരിട്ടിരിക്കുന്ന ഈ പ്രൗഢഗംഭീരമായ ആരാധനാലയത്തിലെ പ്രധാന പ്രതിഷ്ഠ.

ക്ഷേത്രത്തിന്റെ സവിശേഷതകളും പ്രതിഷ്ഠകളും:ഹസന്‍ഹൈഡ് (Hasenheide) പാര്‍ക്കിനോട് ചേര്‍ന്ന് 5,000 ചതുരശ്ര മീറ്റര്‍ വിസ്തീര്‍ണ്ണമുള്ള ഭൂമിയിലാണ് ക്ഷേത്ര സമുച്ചയം നിര്‍മ്മിച്ചിരിക്കുന്നത്. 17 മീറ്റര്‍ ഉയരമുള്ള ഗോപുരത്തില്‍ തദ്ദേശീയരായ ഇന്ത്യന്‍ ശില്പികള്‍ കൊത്തിയെടുത്ത ഇരുന്നൂറിലധികം ദേവതാ ശില്പങ്ങള്‍ കാണാം. ക്ഷേത്രത്തിന്റെ പ്രധാന ഹാളില്‍ ഗണപതി ഭഗവാന്റെ പ്രധാന പ്രതിഷ്ഠയ്ക്ക് പുറമെ മറ്റ് അഞ്ച് ഉപദേവതാ പ്രതിഷ്ഠകളും (Shrines) ഒരുക്കിയിട്ടുണ്ട്. ഗണപതിയുടെ മാതാപിതാക്കളായ ശിവന്‍, പാര്‍വതി എന്നിവര്‍ക്ക് പുറമെ മുരുകന്‍ (യുവരാജാവ്), മറ്റ് കുടുംബാംഗങ്ങള്‍ എന്നിവരുടെ വിഗ്രഹങ്ങളും ഇവിടെ പ്രതിഷ്ഠിച്ചിരിക്കുന്നു.

നിര്‍മ്മാണം പൂര്‍ണ്ണമായും സംഭാവനയിലൂടെ:"എന്റെ വലിയൊരു സ്വപ്നമാണ് ഇപ്പോള്‍ യാഥാര്‍ത്ഥ്യമായിരിക്കുന്നത്" എന്ന് ക്ഷേത്രത്തിന്റെ നിര്‍മ്മാണത്തിന് നേതൃത്വം നല്‍കിയ ട്രസ്ററ് ഭാരവാഹി വില്‍വനാഥന്‍ കൃഷ്ണമൂര്‍ത്തി പറഞ്ഞു. ഏകദേശം 1.1 മില്യണ്‍ യൂറോ (ഏകദേശം 10 കോടിയിലധികം രൂപ) ചെലവഴിച്ചാണ് ഈ ക്ഷേത്രം പണിതുയര്‍ത്തിയത്. ഈ തുക പൂര്‍ണ്ണമായും ഭക്തരില്‍ നിന്നും പൊതുജനങ്ങളില്‍ നിന്നുമുള്ള സംഭാവനകളിലൂടെയാണ് സമാഹരിച്ചത്. കോവിഡ് പ്രതിസന്ധിയും ഇന്ത്യയില്‍ നിന്നുള്ള ഗ്രാനൈറ്റ് കല്ലുകള്‍ ലഭിക്കാനുള്ള താമസം മൂലവുമാണ് നിര്‍മ്മാണം ഇത്രയും നീണ്ടുപോയത്.

5 ദിവസത്തെ ചടങ്ങുകള്‍; ഞായറാഴ്ച കുടമാറ്റം:പത്ത് പ്രമുഖ ഹിന്ദു പുരോഹിതന്മാരുടെ നേതൃത്വത്തില്‍ അഞ്ച് ദിവസം നീണ്ടുനില്‍ക്കുന്ന കടുത്ത ആചാരങ്ങളോടെയുള്ള 'മഹാ കുംഭാഭിഷേകം' ചടങ്ങുകളാണ് ഇപ്പോള്‍ നടക്കുന്നത്. ഉദ്ഘാടന വാരത്തില്‍ ആയിരക്കണക്കിന് ഭക്തര്‍ ക്ഷേത്രം സന്ദര്‍ശിക്കുമെന്നാണ് കരുതപ്പെടുന്നത്.

ജൂണ്‍ 7 ഞായറാഴ്ച രാവിലെ സ്പ്രീ (Spree) നദിയിലെയും ഇന്ത്യയിലെ പുണ്യനദിയായ ഗംഗയിലെയും തീര്‍ത്ഥജലം ക്രെയിന്‍ ഉപയോഗിച്ച് വലിയ ഗോപുരത്തിന് മുകളില്‍ അഭിഷേകം ചെയ്യുന്നതോടെ ചടങ്ങുകള്‍ സമാപിക്കും. ഒക്ടോബറില്‍ ജര്‍മ്മന്‍ ചാന്‍സലര്‍ ഫ്രെഡ്രിക് മെര്‍സും ഇന്ത്യന്‍ പ്രധാനമന്ത്രി നരേന്ദ്ര മോദിയും ഈ ക്ഷേത്രം സന്ദര്‍ശിക്കുമെന്നും സൂചനയുണ്ട്.

പ്രവേശന സമയം: ഞായറാഴ്ചയിലെ പ്രധാന ചടങ്ങുകള്‍ക്ക് ശേഷം ക്ഷേത്രം പൂര്‍ണ്ണമായും പൊതുജനങ്ങള്‍ക്കായി തുറന്നുകൊടുക്കും. ദിവസവും വൈകുന്നേരം 4:00 മണി മുതല്‍ 6:00 മണി വരെയാണ് പൊതുജനങ്ങള്‍ക്ക് പ്രവേശന സമയം അനുവദിച്ചിരിക്കുന്നത്. രാവിലെയും വൈകുന്നേരവുമുള്ള പ്രധാന ആരതികളില്‍ പങ്കെടുക്കാന്‍ യാതൊരുവിധ മുന്‍കൂര്‍ ബുക്കിംഗോ പ്രവേശന ഫീസോ ആവശ്യമില്ലെന്നും ക്ഷേത്ര കമ്മിറ്റി അറിയിച്ചിട്ടുണ്ട്. ജര്‍മ്മനിയിലെ ഐടി ജീവനക്കാര്‍ക്കും വിദ്യാര്‍ത്ഥികള്‍ക്കും ഇതൊരു വലിയ സാംസ്കാരിക കേന്ദ്രമായി മാറും.